En cest sonet coind'e leri. fau motz e capuig e doli. e seran verai e cert. quan n'aurai passat la lima. qu'Amors marves plan e daura. mon chantar que de liei mou. qui pretz manten e governa.
Tot jorn meillur et esmeri. car la gensor serv e coli. del mon so-us dic en apert. sieus sui del pe tro qu'en cima. e si tot venta'ill freid'aura. l'amors qu'inz el cor mi plou. mi ten chaut on plus iverna.
Mil messas n'aug e'n proferi. e'n art lum de cera e d'oli. que Dieus m'en don bon issert. de lieis on no'm val escrima. e quan remir sa crin saura. e-l cors gai grailet e nou. mais l'am que qui-m des Luserna.
Tant l'am de cor e la queri. c'ab trop voler cug la-m toli. s'om ren per ben amar pert. que'l sieus cors sobretracima. lo mieu tot e non s'eisaura. tan a de ver fait renou. q'obrador n'a e taverna.
No vuoill de Roma l'emperi. ni c'om fassa apostoli. qu'en lieis non aia revert. per cui m'art lo cors e-m rima. e si-l maltraich no-m restaura. ab un baisar anz d'annou. mi auci e si enferna.
Ges pel maltraich qu'ieu soferi. de ben amar no-m destoli. si tot me ten en desert. c'aissi'n fatz los motz en rima. pieitz trac aman c'om que laura. c'anc plus non amet un ou. cel de Moncli n'Audierna.
Ieu sui Arnautz qu'amas l'aura. e chatz la lebre ab lo bou. e nadi contra suberna.
Roubaud, Jacques, Les Troubadours, anthologie bilingue, Paris, Éditions Seghers, 1971,
pp. 236-9.